Innihald
Iðunn, sögurit um ýmsa menn og viðburði, lýsing landa og þjóða og náttúrunnar. Safnað, íslenzkað og kostað hefir Sigurður Gunnarsson.
Iðunn kom út á Akureyri árið 1860, aðeins kom út þetta eina tölublað.
Hér er endurprentun sem gerð var að forgöngu Helga Vigfússonar árið 1985.
Það var Sigurður Gunnarsson prestur og prófastur sem var ritstjóri Iðunnar. Fæddur á Ærlæk í Öxarfirði 10. október 1812, dáinn 22. nóvember 1878. Foreldrar: Gunnar Gunnarsson (fæddur 1786, dáinn 7. ágúst 1819) síðast bóndi á Hallgilsstöðum á Langanesi og kona hans Elísabet Sigurðardóttir (fædd 1788, dáin 8. október 1825) húsmóðir. Föðurbróðir Sigurðar Gunnarssonar alþingismanns í Stykkishólmi og tengdafaðir Jóns Jónssonar alþingismanns á Stafafelli. Maki (20. júlí 1841): Bergljót Guttormsdóttir (fædd 12. ágúst 1809, dáin 2. október 1877) húsmóðir, systir Margrétar 1. konu Einars Ásmundssonar alþingismanns. Foreldrar: Guttormur Pálsson og kona hans Margrét Vigfúsdóttir, systir Guttorms Vigfússonar alþingismanns á Arnheiðarstöðum. Börn: Guttormur (1842), Margrét (1843), Elísabet (1846), Guðlaug (1848), Jón (1850), Gísli (1852), Gunnar (1853), Stefán Benedikt (1854).
Hóf fyrst nám í silfur- og látúnssmíðum, en nam síðan skólalærdóm hjá Jóni guðfræðingi Þórarinssyni á Valþjófsstað og séra Guttormi Pálssyni í Vallanesi. Stúdentspróf Bessastöðum 1839.
Stundaði veturna 1839–1841 kennslu í Reykjavík, en var sumarið 1840 fylgdarmaður J. O. Schythe, dansks náttúrufræðings. Settist síðan að í Vallanesi og stundaði kennslu. Fékk 1844 Desjarmýri, vígður 1845. Fékk Hallormsstað 1861, fluttist þangað 1862 og hélt til æviloka. Gegndi jafnframt Þingmúlaprestakalli frá 1869. Prófastur í Suður-Múlaprófastsdæmi 1863–1876. Kynntist lækningum hjá tengdaföður sínum, stundaði þær allmikið og fékk að lokum leyfi stjórnvalda til þess að stunda lækningar.
|
