Austan Elivoga # 14696

Austan Elivoga. Gedichte von Böðvar Guðmundsson. Hier ist das erste Gedichtbuch von Böðvar erschienen.


Dalalæða



Hún læðist frá sjónum inn dalinn á döggvotum skóm

og dún sinn breiðir á holtin og grónar traðir

bæjanna, hylur þá sjálfa einn eftir einn,

ógrynnishaf, sem hvergi fær dunað né sorfið

strönd eða þangsker.

Hún þokast á brattann og fer

þvalköldum álagahöndum um vörður og leiti,

svo drangurinn gengur úr berginu brúnaþungt tröll,

brekkur og hlíðar togna í svimandi hrap.



Hún villir smalann, er leitar sauða og sér

svartálfabörnin að leik fyrir opnum riðum,

og heyrir útburðinn væla, veit að í holti

viðsjáll melrakkinn þýtur nasvís og frár

á sömu slóðir til ánna.

Eða hún hrekur

öndvert á brattann læki, hvítum fossi

stuggar úr gljúfrinu aftur upp fyrir brún.



Einmanalegust allra jarðneskra vætta

eigrar hún náttlangt þvert yfir víðar heiðar

og leitar í mónum löngu horfinna spora

liðinna manna,

hörfar fundlaus á braut

árla, en lætur lifandi grösum að drykk

liggja sólbrotin tár.