Austan Elivoga # 60177

Austan Elivoga. Ljóð eftir Böðvar Guðmundsson. Hér er komin fyrsta ljóðabók Böðvars. Kemur út bókasafni Ivars Orgland. Njörður P. Njarðvík hefur fært Ivari bókina.


Dalalæða



Hún læðist frá sjónum inn dalinn á döggvotum skóm

og dún sinn breiðir á holtin og grónar traðir

bæjanna, hylur þá sjálfa einn eftir einn,

ógrynnishaf, sem hvergi fær dunað né sorfið

strönd eða þangsker.

Hún þokast á brattann og fer

þvalköldum álagahöndum um vörður og leiti,

svo drangurinn gengur úr berginu brúnaþungt tröll,

brekkur og hlíðar togna í svimandi hrap.



Hún villir smalann, er leitar sauða og sér

svartálfabörnin að leik fyrir opnum riðum,

og heyrir útburðinn væla, veit að í holti

viðsjáll melrakkinn þýtur nasvís og frár

á sömu slóðir til ánna.

Eða hún hrekur

öndvert á brattann læki, hvítum fossi

stuggar úr gljúfrinu aftur upp fyrir brún.



Einmanalegust allra jarðneskra vætta

eigrar hún náttlangt þvert yfir víðar heiðar

og leitar í mónum löngu horfinna spora

liðinna manna,

hörfar fundlaus á braut

árla, en lætur lifandi grösum að drykk

liggja sólbrotin tár.