Nýjustu fréttir # 86525

Nýjustu fréttir. Saga fjölmiðlunar á Íslandi frá upphafi til vorra daga. Eftir Guðjón Friðriksson.
Í þessu veglega og viðamikla verki er ítarlega rakin saga blaðamennsku og fréttamennsku á Íslandi allt frá útgáfu fyrsta íslenska tímaritsins, Islandske Maanedstidender, árið 1773 fram til síðustu hræringa og tæknibyltinga í samfélagi nútímafjölmiðlunar. Hér er sagt frá frumherjum í íslenskri blaðaútgáfu og mikið birt af myndum og klausum úr gömlum blöðum, sem sýna stíl og andblæ liðins tíma. Sagt er frá flokksblöðum, héraðsfréttablöðum, gamanblöðum og afþreyingarblöðum, æsifréttablöðum og glanstímaritum, útvarpi og sjónvarpi, og frá ýmsum áberandi og áhrifamiklum einstaklingum úr hópi fjölmiðlamanna. Í bókinni eru hátt í eitt þúsund myndir sem margar eru einstök heimild um íslenska blaðamanna- og fjölmiðlasögu. Bókinni fylgir mjög ítarleg heimildaskrá, enda hefur höfundur mjög víða leitað fanga við efnisöflun og skilað verki sem ekki er aðeins saga íslenskrar fjölmiðlunar, heldur spegilmynd af íslensku þjóðlífi og sögu. (Bókatíðindi 2000).